మంచి సాహిత్యాన్ని అందుబాటులోకి తీసుకురావాలన్న సంకల్పంతో "సారంగ బుక్స్" వారు వారి తొలి ప్రచురణగా- ప్రముఖ కవులు, విమర్శకులు అఫ్సర్, వంశీ కృష్ణ సంపాదకులుగా- జనవరి రెండో తేదీన విజయవాడ బుక్ ఫెస్టివల్ లో విడుదల చేసిన సంకలనమే 'అనేక'. 2000 నుండి 2009 వరకీ వచ్చిన మంచి కవితలను ఏరి కూర్చి... ఈ పదేళ్ళలో తెలుగు కవిత్వం తిరిగిన మలుపులు, దాటుకొచ్చిన చౌరాస్తాలూ, చేరుకున్న అనేక మజిలీలూ…అన్నీ సాక్షాత్కరించేలా దాదాపు 200 మంది కవుల కవితలతో “అనేక” సంకలనాన్ని రూపొందిచారు. ముఖ్యంగా గ్లోబలైజేషన్ తరవాత తెలుగు కవిత్వంలో ఎలాంటి మార్పులు వచ్చాయో అక్షర సాక్షిగా నిలిచే కవితలతో ఈ సంకలనం వెలువడింది.

అత్యంత విలువైన సంస్కృతీ సాంప్రదాయక జానపద గీతాల సంపద మరియు రెండు సాంప్రదాయక సంగీతాల గని మన భారతదేశం. ఒకటి హిందూస్థానీ, రెండోది కర్ణాటక సంగీతం. మహోన్నతమైన ఈ రెండింటి ఆధారంగా దశాబ్దాల సినీ సంగీతం నిత్యనూతనంగా వేలాది సుమధుర బాణీలను పాటల రూపంగా మన జీవితాల్లో ఒక భాగమై కలిసి జీవిస్తూ మనల్ని జీవింప జేస్తూనే ఉన్నాయి. ప్రతీ భావానికీ, ప్రతీ ఆలోచనకీ మనిషి మస్తిష్కంలో చెలరేగే ప్రతీ ఊహకూ పాట రూపేణా రూపకల్పన చేయబడింది. మన దేశంలో జాతర, డ్రామా మరియు థియేటర్ అనాదిగా ప్రఖ్యాతమై జాతర బెంగాలీ థియేటర్, రవీంద్ర సంగీత్, కాశ్మీరీ జానపద గుబాళింపులు అలాగే మరాఠీ భవగీత్, అన్నీ మేలికలయిగా ఉత్తరాది హిందీ సినిమా పాటలయి మలయ మారుతంలా మన మనుసుని దోచుకుంటూనే ఉన్నాయి.  ...